Sr Kamuzima Marcianne yagabiwe n’abo yarokoye muri jenoside yakorewe Abatutsi

Ubwo hizihizwaga umunsi w’Intwari z’ u Rwanda ku nshuro ya 26, bamwe mu baribarahungiye  kuri paruwasi ya Shangi mu gihe cya jenoside yakorewe abatutsi bakaza no kuharokokera babikesha Umubikira wabarwanyeho Kamuzima Marcianne, nabo bazirikanye ubwo butwari bwe bakora urugendo baza kumushimira banamugabira inka 2

Nk’uko babyivugira, abarokokeye I Shangi bahamya ko Sr Kamuzima yabakoreye igikorwa gikomeye cyo kubitaho no kubitangira mu gihe cyari gikomeye kandi na we akaba yari ari mu bahigwaga. Bamwe bagiye bagenda bagakiza amagara yabo ariko we yemera kugumana na bo.

Bavuga ko yabahishe ahantu hatandukanye, akabashakira ibyo kurya ndetse akanashakira imiti ababaga barwaye n’ababaga bakomeretse.

Nyuma ya jenoside yakorewe abatutsi, uyu mubikira yakomeje no kwita ku mfubyi zari zisigaye iheruheru none ubu bavuyemo abagabo bari mu mirimo itandukanye hirya no hino mu gihugo ndetse no hanze yacyo.

Bamaze kzirikana ibi byose, batekereje gushimira uyu mubyeyi ubwo bwitange maze bacyuza igitaramo cyo kumucyeza mu ruhame kugira ngo bibere isomo n’abandi benshi bibatere ubutwari.

Sr Kamuzima avuga ko ibyo yakoze abiterwa n’urukundo n’umutima ugira impuhwe yigishijwe anasaba Abantu kuwugira kuko ari bwo isi yagira icyanga ikaryohera abayituye.

Sr Kamuzima w’imyaka 84 yagizwe Umurinzi w’Igihango ku rwego rw’Igihugu kubera ibi bikorwa by’Indashyikirwa yakoze.