Ikipe y'abagore y'umurenge wa Mahembe ikomeje kuba ubukombe mu ntara y'Iburengerazuba

Ku wa 29 Weruwe 2026 Ikipe y'abagore y'umurenge wa Mahembe mu cyiciro cy'abagore yatwaye igikombe mu mikino y'Amarushanwa Umurenge Kagame Cup 2025-2026 ku rwego rw'Intara y'Iburengerazuba ku nshuro ya kabiri yikurikiranya, ikomeza kuba ubukombe muri iki cyiciro cy'amakipe y'abagore muri iyi Ntara. 

Urugendo rw'iyi kipe rwatangiriye mu mikino ya ½ kubera ko yari yaritwaye neza umwaka ushize aho yatwaye ighikombe ku rwego rw'Intara n'Igihugu, bityo mu mikino ya ½ ihura n'ikipe y'Umurenge wa Murambi wo mu karere ka Karongi, Mahembe ikomeza ku bitego 6-0 mu mikino yombi. 

Umukino wa Nyuma wahuje Mahembe na Rusebeya yo mu karere ka Rutsiro kuri stade ya Rubavu, Mahembe yatsinze Rusebeya ibitego 2-0 yegukana igikombe ku rwego rw'Intara y'Iburengerazuba. 

Mbere yo kugera ku rwego rw'intara, ku rwego rw'Akarere ka Nyamasheke ikipe y'umurenge wa Mahembe yari yatangiriye mu mikino ya ¼, ihura n'abakobwa ba Gihombo, aba banyagirwa ibitego 9-0, naho mu mikino ya ½ ku rwego rw'Akarere, Mahembe yakuyemo umurenge wa Macuba ku bitego 2-0.