Ubuhinzi: Nyuma yo guhabwa ibikoresho by'ubuhinzi, icyizere cyo kongera umusaruro no kwiteza imbere ni cyose mu rubyiruko rwibumbiye mu matsinda y'ubuhinzi

Mu rwego rwo guteza imbere ubuhinzi bukorwa n'urubyiruko no kongerera agaciro ibikorwa byarwo, amatsinda 19 y'urubyiruko rw'abahinzi bo mu Karere ka Nyamasheke yahawe ibikoresho by'ibanze bizabafasha kwagura ibikorwa byabo by'ubuhinzi n'ubucuruzi bubushingiyeho.

Iki gikorwa cyakozwe ku wa 4 Kanama 2026 binyuze mu mushinga Shora Neza, ushyirwa mu bikorwa na DUHAMIC-ADRI ku bufatanye n'Akarere ka Nyamasheke, ku nkunga ya “Mastercard Foundation” ifatanyije na “World Food Programme (WFP)”.

Ibikoresho byatanzwe birimo amagare 39 yo gutwara umusaruro w'ubuhinzi, amapombo 10 atera imiti y'ibihingwa, ingorofani 7, amasuka 108, iminzani 2 ipima kugeza kuri kilogarama 300, inshundura z'igicucu (shade-nets) zo kurinda ibihingwa, arozwari 38 ndetse na mudasobwa zigendanwa 2. Ibi bikoresho bizafasha ayo matsinda kunoza imikorere, kugabanya igihombo no koroshya ibikorwa by'ubuhinzi kuva mu murima kugeza ku isoko.

Abahawe ibi bikoresho bagaragaje ko bibongereye icyizere cyo kwagura ibikorwa byabo no kurushaho guhanga udushya mu buhinzi, bemeza ko bizabafasha kongera umusaruro, kuwugeza ku isoko mu buryo bworoshye no kongera inyungu ziva mu bucuruzi bwabo.

Umushinga Shora Neza ugamije guteza imbere ubuhinzi bukorwa n'urubyiruko nk'ubucuruzi bubyara inyungu, kongera umusaruro, guteza imbere ubudahangarwa bw'ibihingwa no guhanga amahirwe y'imirimo ku rubyiruko.